بیروڕا

09:18 - 15/6/2021

ابراهیم حاجی

پاڵپشتی گەشتوگوزاربن باکاری یاسایی خۆی بکات

پاڵپشتی گەشتوگوزاربن باکاری یاسایی خۆی بکات

ئەم و ئەوی پێ مەکەن
ئیبراهیم حاجی زەڵمی
سەرەتای قسانم بە سەرگوزەشتەیەک دەهێنم، لە سەروبەندی دوای راپەرین وسالی ١٩٩٢ بەرەی کوردستانی هەبوو،  لەم سنوورەی ئێمە کۆمیتەیەکی گچکەی ناوچەیی درووستکرابوو لەهەموو پارتەکانی، ئەوکات هەر پارتەو نوێنەرێکیان هەبوو لەدرووستکردنی، کەبنکەکەی لە هاوینە هەواری ئەحمداوابوو منیش لابەلا وەک نوێنەری یەکێک لەوپارتانە ئەندامی ئەو کۆمیتەیە بووم، کەکارەکانی ئەوکات و کێشە هەمەجۆرەکان دەهاتنە ئەوێ و لەبری حکومەت و یاساو..هتد بریاری چارەسەری و بەدەمەوەچوونی لەلایەن هەمووانەوە بۆ دەدرا، لەیادمە یەکێ لەوکارانەی ئەو کۆمیتەیە دانانی بازگەکان بوو بەتایبەتی لەنزیک مەرزو سنوورەکان و دەروازەی شارو شارۆچکەکان... کەزیاتر ئامانج لێی ئاسایش وهەروەها بەرگیری کردن بوو لە کاری نابەجێ و نەبردنە دەرەوەی شتی قاچاغ و ئەوانە، هەر پارتەو دووسێ کەسی بۆئەو مەبەستە دیاریکرد، لە کاتی بەسەرکردنەوەی یەک دوو هاورێم منیش چووم لەگەڵیان بۆ بازگەیەکی دەروازەی شار کەوتین بە مل موناقشەو دەنگەدەنگێکدا لەنێوان کەسێکی ڕیش سپی و گەنجێک کە کۆمیتەکە داینابوو لە بازگەکەدا.
 لە بازگەکە ریش سپیەکە ئێمەی بینی رووی تێکردین ئەم قسانەی گوت: ئەری کاکە ئەو برادەرەتان لێرە بۆچی داناوە؟ پێی وتووم: خاڵۆ حسین بێ زەحمەت تەسکەرەکەتم بدەرێ! 
منیش وتوومە: رۆڵە تۆ دەمناسی و دەزانی ناوم حسەینەو ئەوەندەش ئاشناین پێم دەلێی خاڵۆ ئیتر تەسکەرەی منت بۆچیە؟؟ ئەگەر شتێکی قاچاغیشم پێیە لیم بسێنە کەپێم نیە؟ ئێمە بۆیە راپەرینمان کرد نەجاتمان بێ لە (هویتک!!). رۆڵە بازگە بۆ خەڵکە هەژارەکە دامەنێن برۆن بازگە بۆ ئەوانەی تر دابنێن ، بەر لەو تاڵانیە بگرن هیچیان نەهێشت! خۆ هەر لەویش بازگە هەیەو بە شیرینی هەمووشتی ئەم وڵاتە ئاودیو دەکرێت.!! 
لێرەدا قسەی ئەو پیاوەو ئەوی تری وازلێدەهێنم و دەچمە سەر مەبەستی سەرەکی، سێ خاڵ لە سۆنگەی ئەم یادەوەریەوە بەرچاو دەخەم:
یەکەم:  گومانی تیانیە ئێمە لەوکاتەوەو لەدرووستکردنی پەیکەربەندی کۆمەڵێک دەزگای ئەم کۆمەڵگەیەمان بەتایبەت ئەوانەی پەیوەندیدارن بە کۆنترۆڵی کۆمەڵایەتی و ئاسایشی کۆمەڵایەتیەوە هێشتا بنچینە مەعریفی و ناسینیەکەیان  دەڵەمەیی پێوە دیارەو بونیادە یاسایی و کار بۆ ئامانجە راستەقینەکەی لە چاو وڵاتانی ئەوروپاو خۆرئاوا تەنها کەوتوینەتە رێ ! بۆیە زۆرمان ماوەو کەممان بڕیوە!.
چونکە هەر لەوسەرەتاوە دەسەڵاتدارانی حیزبی کوردی هەر لەسەرەتاوە بەخراپ هێنانی، بەنێو تونێلی شەری ناوخۆدا بردیانن، بەڵام دواجار وردە وردە بەرەو رێکردن چوون، تا بەئیمرۆ لەهەندێ شوێن و هەندێ جار وەها دەجوڵێنرێن بەتایبەتی دژی دەنگی ئازادو رۆژنامەنووس و راو بیرو و بیروباوەڕیان !! خەریکە وای لێدێت کە لای  هەندێ خەڵکی کۆمەڵگەکەمان مەهام و ئەرک و ئامانجی ئەم دەزگایانە بەتایبەتی دەزگا پۆلیسی و ئاسایشیەکانی خۆمان لە پێگەی متمانەوە بیانگۆڕن بۆ شتی تر، کەدەبێت ئەمە رێگەی پێنەدرێت و راست بکرێتەوە!! چونکە ئەم دەزگایانە دەزگای یاسایی و کۆنترۆلی کۆمەلایەتین و چۆن لەدەزگای خێزاندا باوک و دایک رۆڵ و مەهامیان هەیە بۆ راگیرکردنی ئاسایشی خێزان ئاوەهاش دەزگای پۆلیس و ئاسایش هەمان رۆلیان هەیە و پارێزەری ئاسایشی گشتی دانەکانی کۆمەڵگەو هەموودەزگاکانینی، نابێت لە ئەرکی دڵسۆزانەو خەمخۆریان بۆ کۆمەڵگەو ئاسایشی کۆمەڵگە ببرێنە قاڵبی پێچەوانەکەی خوانەخواستە وەک جاران حیزبی بەعس دەیکرد. 
دووەم: یاسا و جێبەجێکردنی یاسا لە دەنگو رەنگ و جووڵەی ئەم دەزگایانانەوە دەرکەوتە دەبێت، هەر جووڵەو رەفتارێکیان راستەوخۆ واتای پراکتیکی یاسای هەبووی نێو کۆمەڵگەکەمانن، چەندە چالاک بن و دەنگو رەنگی یاسایی بنوێنن ئەوەندە مانای بەرقەراری یاساو زیندوویەتی دەسەلاتی یاسایی کۆمەڵگەکەی ئێمەن، بۆیە چاوی کۆمەڵگە هەمیشە لەسەر جووڵەو کارو چالاکی ئەم هێزو فەرمانگانەیە، چونکە کارەکەیان سەلمێنەری جۆری دەسەڵات و شوناسی حوکمرانی کۆمەڵگەکەن.  لەولاشەوە هەر کەمتەرخەمی و جیاوازی کردن و بەدەم هەژاردا رۆیشتن و بەردەسی بن بۆ دەوڵەمەندان و دەسرۆیشتوان ئەوەندە لە شوناسی دەسەڵاتی یاسایی و جێبەجێکاری کۆمەڵگەکەمان دەدەن.
سێیەم: بوون ئامادەگی ئەم هێزانە لەپشت جوولە یاساییەکانی دامو دەزگایەکانی حکومەت و زووبەدەمەوەچونیان لەکاتی دەرکەوتەبوونی ناتەواوی و ئاژاوەو تاوانێک بۆ خۆی مانای زیندوویی دەزگای کۆنترۆڵی یاسایی و ئیداری حکومەت دەدەن، بۆیە هەرکەمتەرخەمی و لایەنگیری و ساردی نواندنێک واتا ئەرێنیەکەیان پێچەوانە دەکەنەوە. لێرەوە پێویستە لە دامودەزگا یاسایی و ئیداریەکان بە ئەمانەتەوەو بە دڵسۆزیەوە مامەڵە لەگەڵ جوڵاندن و پرسە جیاوازەکانەوە بچن،  بەتایبەتی لەو شوێنانەی کە شوێنی گشتین و زۆرترین خەڵکی بیانی ڕوویان تێ دەکەن وەک شوێنە گەشتیاریەکان. بوون و ئامادەیی هێزە پۆلیسی وئەمنیەکانی پەیوەندیدار لە ناوچە هاوینە هەواریەکان متمانەی زیاتر و جوانتر دەبەخشن بە ژینگە کۆمەڵایەتی و سروشتیەکە لە پشت کارە یاساییەکانەوە.
چەند رۆژێکە بەرێوەبەرایەتی گەشتوگوزاری هەڵەبجە هەڵمەتێکی گرنگ و یاسایی دەست پێکردووە، وەک گەشتوگوزار لە ١٣ ی ئەم مانگەوە خستویەتیە سەر شانی بەلابردنی ئەو نارێکی و ناتەواوی و تەجاوەزاتانەی کە کراونەتە سەر ماڵ و موڵکی گشتی و شێوەی جوانی هاوینەهەوارەکانی هەڵەبجەو هەورامانی تێکداوە، هیوادارم بەرپرسانی ئیداری هەر لە پارێزگارەوە تا خوارەوە لە ناوچەکە لەپشت بەرێوەبەرایەتیەکەوە ببن و دامودەزگاکانی پۆلیس و ئاسایش لەپێناو جێبەجێکردنی یاسا بە شێوەیەکی یەکسان و دادپەروەرانە بجوڵێنن، کەسانی کەرتی تایبەت و دەوڵەمەندەکان رێگە لە کارو ئەرک و پرۆژەکەی بگرن و ئەم و ئەوی پێ بکەن!! نەک بۆ هەژارو نەدارو خەڵکە رەشو رووتەکە ببن بە جێبەجێکاری یاساو بۆ پیاوانی دەوری بەرپرسەکانیش ببن بە شتێ تر!!  چونکە ئەوەی برواتە ناو هاوینە هەوارەکەوە دەزانێت کە کێ تەلبەنکاری زۆرینەی هاوینەهەوارەکەی کردووە بەتەلی درکاوی و هەمەجۆر!!

بۆچوونی تۆ؟
Loading...
بۆچوون

هیچ بۆچوونێک دانەنراوە.